Islahat Fermanı

Galip DOĞAN

Islahat fermân-ı hümâyûnu suretidir:(*)

Bâd-el-elkab,

Malûm ola ki yed-i müeyyed-i mülûkâneme vedia-i cenâb-ı bâri olan kâffe-i sunuf-ı tebea-i şâhânemin her cihetle temamî-i husûl-i saadeti hâli akdem-i efkâr-ı hayriyet disar-ı pâdişâhanem olarak cülûs-ı meymenet menus-ı hümâyunum günündenberi bu babda zuhura gelen himem-i mahsusa-i şâhânemin hamdolsun pek çok semere-i nâfiası meşhut olup mülkü milletimizin mâmuriyet ve serveti anbean tezayüt etmekte ise de Devlet-i aliyyemizin şanına muvafık ve milel-i mütemeddine arasında bihakkın hâiz olduğu mevki-i âlî ve mühimme lâyık olan hâlin kemale îsali için şimdiye kadar vaz’ ve tesisine muvaffak olduğum nizamât-ı cedide-i hayriyyenin ez ser-i nev tekit ve tevsii matlub-ı mâdelet mashûb-ı pâdişâhanem olduğu hâlde umum tebea-i şâhânemizin mesaiy-i cemîle-i hamiyetkâraneleri ve müttefik-i hass-ı bahir-ül-ihlâsımız olan düvel-i mufahhamanın himmet ü muâvenet-i hayrhâhaneleri eseri olmak üzere Devlet-i aliyyemizin bu kerre biinâyetillâhi Taalâ haricen hukuk-ı seniyyesi bir kat daha teekküt eylediğine ve bu cihetle şu asr Devlet-i aliyyemiz için bir zamân-ı hayriyyet iktiranın mâbadi olacağından dahilen dahi saltanat-ı seniyyemizin tezyid-i kuvvet ve meknetini ve revâbıt-ı kalbiyye-i vatandaşî ile birbirine merbut olan ve nazar-ı madalet-eser-i müşfikanemde müsavi bulunan kâffe-i sunûf-ı tebea-i şâhânemin her yüzden husûl-i temamî-i saadet-i hâl ve mamâlik-i şâhânemizin mamuriyetini müstelzim olacak esbâb-ı vesâilin anbean ilerlemesi murad-ı merhamet îtiyad-ı mülûkânem iktizasından bulunduğuna binaen hususat-ı atiyet-üz-zikrin icrasına irâde-i mâdelet ifade-i pâdişâhanem şerefsudur olmuştur.